නීතිඥ ගෝමින් දයාසිරිගේ තර්ජනය...?

අගෝස්තු 27දා විකාශය වූ දෙරණ වාදපිටිය වැඩසටහනට සහභාගී වූ නීතිඥ ගෝමින් දයාසිරි මහතා එම වැඩසටහනටම සහභාගී වූ නීතිඥ නිමල්කා ප්‍රනාන්දු මහත්මියට චෝදනා කළේ රටේ ඇති මානව හිමිකම් ප්‍රශ්න රට තුළ ඇති අධිකරණ ඇතුළු දේශීය යාන්ත්‍රණ වෙත ඉදිරිපත් කොට විසඳා ගන්නවා වෙනුවට රටට සතුරුකම් කරන බලවේග නියෝජනය කරන නවනීදම් පිල්ලේ වැනි අය වෙත ඉදිරිපත් කිරීම සම්බන්ධයෙනි. එක් අවස්ථාවක නිමල්කා දෙසට දඹරැගිල්ල දිගු කළ ගෝමින් දයාසිරි නීතිඥ මහතා ‛පිල්ලේ හමුවී මොනවද කිව්වේ? මොනවද කිව්වේ?’ කියා තර්ජනාත්මකව විමසීය.
මෙවර සමබිම ඉරිදා සංග්‍රහය වෙන්වන්නේ නිමල්කා ඇතුළු සිවිල් සමාජයේ නියෝජිතයන් විසින් නවනීදන් පිල්ලේ මහත්මිය හමුවූයේ කුමන පදනමක් මතද යන්න සහ ඔවුන් ඇය හමුවී කිව්වේ මොනවාද යන්න සිංහල කියවන පාඨකයාට දැනුම් දීම වෙනුවෙනි.

ආචාර්ය නවනීදම් පිල්ලේ මහත්මිය සතියක නිල සංචාරයක් සඳහා ලංකාවට පැමිණියාය. ඇය ලංකාවට පැමිණියේ ලංකා ආණ්ඩුවේ ආරාධනයෙනි. ඇගේ සංචාරයේදී ඈ සමඟ ගමන් කරන පරිවාර සේනාවෙහි ස්විට්සර්ලන්තයේ ජිනීවා නුවර සිටින එක්සත් ජාතීන්ගේ සංවිධානයේ ශ්‍රී ලංකාවේ නිත්‍ය නියෝජිත රවිනාථ ආරියසිංහ තානාපතිවරයාද එක්ව සිටින නිසා ඒ බව වඩා හොඳින් තේරුම් ගත හැකිය.

නවනීදම් පිල්ලේ මහත්මිය ලංකාවට පැමිණීමට හේතුව 2011 වසරේ ලංකා ආණ්ඩුව විසින් කරන ලද ආරාධනය බව සැබෑ වුවත් එම සංචාරය සමඟ ලංකාව සම්බන්ධව එක්සත් ජාතීන්ගේ සංවිධානයේ මානව හිමිකම් කවුන්සිලය විසින් පිළිවෙළින් 2012 සහ 2013 වසරවලදී සම්මත කරගන්නා ලද ‛ශ්‍රී ලංකාවේ ප්‍රතිසන්ධානය සහ වගවීම’ පිළිබඳ යෝජනා සම්මතයන් දෙකද බලපායි. එම යෝජනා මගින් මානව හිමිකම් කවුන්සිලයේ සාමාජික රාජ්‍යයන් ලංකා ආණ්ඩුවෙන් ඉල්ලා සිටියේ ආණ්ඩුව විසින්ම පත්කරන ලද දේශීය යාන්ත්‍රණයක් වන උගත් පාඩම් සහ ප්‍රතිසන්ධාන කොමිසමේ නිර්දේශ ක්‍රියාත්මක කිරීම සඳහා කාල රාමු සහිත ක්‍රියාකාරී සැලැස්මක් සාදා එය අනුගමනය කරන ලෙසය. මහ කොමසාරිස්වරිය ලංකාවට පැමිණ ඇත්තේ එම නිර්දේශ ක්‍රියාත්මක කිරීම සම්බන්ධව ලංකා ආණ්ඩුව ලබා ඇති ප්‍රගතිය පිළිබඳව සොයා බැලීමටය. ඇගේ සංචාරයේදී ඇය සොයා ගත් දේ ඇසුරෙන් ඇය විසින් කරුණු සහිත වාචික වාර්තාවක් 2013 සැප්තැම්බර් මාසයේදී සහ සවිස්තර ලිඛිත වාර්තාවක් 2014 මාර්තු මාසයේදීද මානව හිමිකම් කවුන්සිලය වෙත ඉදිරිපත් කළ යුතුය.

එම වාර්තාව සඳහා කරුණු ලබා ගැනීමට ඇය විසින් මුණගැසීමට නියමිත පිරිස් අතර එක් වැදගත් පාර්ශ්වයක් වන්නේ සිවිල් සමාජ සංවිධාන හෙවත් රාජ්‍ය නොවන සංවිධාන නියෝජිතයන්ය. මෙම සංවිධාන වනාහි එක්සත් ජාතීන්ගේ යාන්ත්‍රණයන් වෙත කේලාම් කියන පිරිසයක් වශයෙන් ලංකාවේ සිටින සමහර දේශපාලනඥයන් සහ ජනමාධ්‍යවේදීන් විසින් හඳුන්වනු ලැබේ.

උගත් පාඩම් සහ ප්‍රතිසන්ධාන කොමිසමේ නිර්දේශ ක්‍රියාත්මක කිරීම පිළිබඳව තම අදහස් සහ නිර්දේශ ඇතුළත් ඒකාබද්ධ ලියැවිල්ලක් ලංකාවේ මානව හිමිකම් පිළිබඳව ක්‍රියාකරන රාජ්‍ය නොවන සංවිධාන එකතුවක් විසින් මහ කොමසාරිස්වරිය වෙත භාර දී ඇත. එම ලියවිල්ලේ අඩංගු කරුණු සනාථ කිරීම සඳහා කරුණු සහිත ඇමුණුම්ද ඒ සමඟ ඉදිරිපත් කොට ඇත.

මෙම ලියැවිල්ල සැකසීමේ ක්‍රියාවලිය සම්බන්ධීකරණය කරන ලද්දේ වෙනස්කොට සැලකීම්වලට සහ වර්ගවාදයට එරෙහි ජාත්‍යන්තර ව්‍යාපරයේ ආසියානු කමිටුව, විකල්ප ප්‍රතිපත්ති කේන්ද්‍රය, රයිට්ස් නව් සාමුහිකය, රයිට් ටු ලයිෆ් මානව හිමිකම් මධ්‍යස්ථානය සහ ඉන්ෆෝම් මානව හිමිකම් දත්ත කේන්ද්‍රය විසිනි. 

සුදර්ශන ගුණවර්ධන