බණ්ඩාරනායක මහත්මිය අද (4) කොමිසම හමුවේ පැයක් පමණ කාලයක් පෙනීසිටි අතර පෙර වතාවලදී තමන් මතු කළ විරෝධතාවලට කොමිසමෙන් ප්‍රතිචාරයක් ලැබී නැතැයි ද, කොමිසම තමා සම්බන්ධයෙන් අගතිගාමීව දේශපාලන වශයෙන් හිරිහැර කරතියි ද කියා සිටියාය.
කොමිසමේ කොමසාරිස්වරුන් දෙදෙනකු සම්බන්ධයෙන් තමන් මතු කළ මූලික විරෝධතාවට පිළිතුරු දෙනු වෙනුවට කොමිසම තමාට එරෙහිව මහේස්ත්‍රාත් උසාවියේ නඩු පැවරීමට ක්‍රියා කර ඇතැයි ද කොමිසම දේශපාලන චේතනාවෙන් තමාට හිරිහැර කිරීමට මුළු ක්‍රියාවලියම යොදා ගන්නා බව ද ඇය චෝදනා කළා ය.
කොමසාරිස්වරුන් දෙදෙනකුට එරෙහිව මතුකළ විරෝධතා ගැන තීරණයක් දෙන්නැයි ඇය වෙනුවෙන් පෙනී සිටි නීතීඥවරු මීට පෙර ද ඉල්ලා සිටියහ.
දැනට කරගෙන යන පරීක්ෂණ වලදී ඉදිරියට සිදු වන්නට ඇති දේ ගැන සඳහන් කරමින් රජයට අයත් පුවත්පතක ගිය සතියේ පළ වූ ලිපිය සම්බන්ධයෙන් පූර්ණ පරීක්ෂණයක් පවත්වන්නැයි ද ඇගේ නීතීඥවරු කොමිසමෙන් ඉල්ලා සිටිති.
පසුගිය මැයි මාසයේ කොමිසම හමුවේ පැවැති පරීක්ෂණයේදී හිටපු අගවිනිසුරුවරියගේ නීතීඥ කණ්ඩායමේ ප්‍රධානියා වන ජනාධිපති නීතීඥ නලීන් ලද්දුවහෙට්ටි මහතා කියා සිටියේ කොමසාරිස්වරුන් තිදෙනා ගෙන් දෙදෙනකු පක්ෂපාතීව කටයුතු කරන බවයි.
සෙලින්කෝ නඩුව විභාග වෙද්දී හිටපු අගවිනිසුරු අශෝක ද සිල්වා මහතා ටි්‍රලියම් නිවාස සංකීර්ණයෙන් තට්ටු නිවාසයක් මිලදී ගෙන ඇති බවත් ඔහු හා කොමිසමේ සභාපති බාලපටබැඳි මහතා අතර පවත්නා නෑ කම නිසා බාල පටබැඳි පක්ෂපාතීව කටයුතු කරන බවත් විරෝධතාවයෙන් චෝදනා කෙළේය.
බාලපටබැඳි හා ජයන්ත වික්‍රමරත්න යන කොමසාරිස්වරුන් තමාට එරෙහි පරීක්ෂණ විභාග කිරීම සාධාරණ යුක්ති ධර්මයට හා නීතියේ ස්වාධිපත්‍යයට පටහැනි යැයි බණ්ඩාරනායක මහත්මිය කළ චෝදනාවන්ට කොමිසම පිළිතුරක් දී නැත.
'බාලපටබැඳි මහතා පක්ෂපාතී යැයි මා කියනුයේ හිටපු අගවිනිසුරු අශෝක ද සිල්වා මහතා හා ඔහු අතර ඇති නෑ කම නිසාය. බාලපටබැඳි මහතාගේ පුත් ඉසුරු, සිල්වා මහතාගේ දියණිය කණිෂ්කා සමග විවාහ වී සිටිනවා.' යනුවෙන් ඇය ලිපියක් මගින් කොමිසමට දන්වා ඇත.
බණ්ඩාරනායක මහත්මියගේ චෝදනා විමසන අල්ලස් කොමිසමේ කොමසාරිස්වරයකු වන ජයන්ත වික්‍රමරත්න මහතා පොලිසියේ සිටියදී ඔහුගේ උසස්වීමක් සම්බන්ධයෙන් ඉදිරිපත් කැරුණු මූලික අයිතිවාසිකම් පෙත්සමක් තමා අගවිනිසුරු සමයේ විනිශ්චයට භාජනය කළ විනිශ්චය මණ්ඩලයකින් ඉවත දැමූ නිසා ඔහු පක්ෂග්‍රාහීව කටයුතු කරන බවට තිඛෙන චෝදනාවද කොමිසම සැලකිල්ලට ගෙන නැත.
වික්‍රමරත්න මහතාගේ බිරිය මාධ්‍යයට කළ ප්‍රකාශයකින් ඇයගේ අගතිගාමී බව පැහැදිලි වන්නේයැයි ද බණ්ඩාරනායක මහත්මිය කියා ඇත.
කොමිසමේ අධ්‍යක්ෂ ජනරාල්ට ඇය සිය විරෝධතා ඉදිරිපත් කරමින් පවසා ඇත්තේ කොමිසමේ සභාපති බාලපටබැඳි මහතා මාධ්‍යයට ප්‍රකාශ නිකුත් කිරීමෙන් 'රහස්‍ය භාවය' පිළිබඳ නීතිය උල්ලංඝනය කර ඇති බවයි.
බාලපටබැඳි, එන්. ටී. විමලචන්ද්‍ර හා ජයන්ත වික්‍රමරත්න යන කොමසාරිස්වරු ශිරාණි බන්ඩාරනායක මහත්මියට එරෙහි චෝදනා විභාග කිරීමට පත් කරනු ලැබ සිටිති.
No comments:
Post a Comment