මාතලේ නාවුල ප්‍රදේශයේදී පසුගියදා ඇතිවු ගැටුමට සබන්ධ වාහන අතර ඉඩම් අමාත්‍යංශයට අයත් වාහන ද ඇති බව කැෆේ සංවිධානය කියයි.
එහි විධායක අධ්‍යක්ෂ කීර්ති තෙන්නකෝන් මහතා මේ සම්බන්ධයෙන් කරුණු විමසා ඉඩම් අමාත්‍යංශ ලේකම් ටී අශෝක පීරිස් මහතා වෙත ලිපියක්ද යවා තිබේ.
පසුගිය ජුලි 28 වනදා මාතලේ නාවුල ප්‍රදේශයේදී සිදුවු ගැටුමට සම්බන්ධ වාහන අතරින් WP KH 0262 දරණ කළු පැහැති ජීප් රිය ඉඩම් අමාත්‍යංශයට අයත් එකක් වන අතර එය ඉඩම් සහ ඉඩම් සංවර්ධන අමාත්‍ය ජනක බණ්ඩාර තෙන්නකෝන් ගේ පුත්‍රයා වන ප්‍රමිත බණ්ඩාර තෙන්නකෝන් මහතාගේ මැතිවරණ ව්‍යාපාරයට යොදවා ඇති බව කීර්ති තෙන්නකෝන් මහතා මෙම ලිපියෙන් පෙන්වා දී තිබේ. එමෙන්ම ඉඩම් අමාත්‍යංශයට අයත් බව කියන ගරාජ් අංක සහ නීති විරෝධී අංක සහිත වාහන රැසක්ම මධ්‍යම පළාතේ මැතිවරණ ව්‍යාපාරයේ යොදවා ඇති බවට පැමිණිලි රැසක්ම ලැබී ඇති බවද කැෆේ සංවිධානය අවධාරණය කරයි.
මෙලෙස රජයේ විවිධ ආයතන වලට අයත් වාහන මැතිවරණ ව්‍යාපාරය සදහා යොදාගැනීම පිළිබද සිදුවීම් මේ වන විට පළාත් තුනෙන්ම වාර්තා වන බවද තෙන්නකෝන් මහතා පෙන්වා දෙයි. රාජ්‍ය සම්පත් හා දේපළ මැතිවරණ ව්‍යාපාරය සදහා යොදාගැනීම නීති විරෝධී ක්‍රියාවක් වන අතර, මෙලෙස රාජ්‍ය දේපළ පරිහරණය කිරීම් පිලිබද කැෆේ සංවිධානය මැතිවරණ කොමසාරිස්වරයා ඇතුළු අදාළ බලධාරීන් වෙතද ලිඛිතව දැනුම් දී තිබේ .
No comments:
Post a Comment