යශෝදා විමලධර්මගේ ප්‍රකාශකර ගන්න බැරි හැඟීම් සමුදායේ ඇතුළාන්තය

පුංචි තිරයේ  කඳුළු බිඳුව යැයි කාලයක් පුරාම කොයි කවුරුත් කිව්ව  යශෝදා විමලධර්ම සමඟ කළ පුංචි කතා බහක්
කාලයක් ඔබ පුංචි තිරයේ කඳුළු බිඳුව වෙලා හිටියා?

ඒක ඔබේ හැඳින්වීමක්. නෑ ඒක ඒ කාලේ ප්‍රේක්ෂකයා අතර තිබුණු කතාබහක්, මට ලැබුණු හැම චරිතයක්ම වගේ විවිධ දුක්ඛ දෝමනස්සවලට ගොදුරු වුණු ඒවා. ඔවුන් ඒ කඳුළු මැදින් ජීවිතේ ජය ගන්න උත්සාහ කළා.

ඒකාකාරී බවක් දැනුණේ නැද්ද?

එහෙම දැනුණේ නෑ. මං උපරිම විදියට ඒ චරිතවලට සාධාරණත්වය ඉටු කරන්නයි උත්සාහ කළේ. කාගේ හරි නිර්මාණයක් වැඩිපුර ප්‍රේක්ෂක ග්‍රහණයට ලක්වුණාම අපේ නිර්මාණකරුවෝ ඒ වගේම නිර්මාණ ඒ වගේම චරිත ගොඩනඟන්න උත්සාහ ගන්නවා. ප්‍රේක්ෂකයාට ඒකාකාරී චරිත බව හැඟෙන්නේ ඒනිසයි.


ඒත් අද ඔබ පුංචි තිරයේ දකින්නට නෑ

ඒ කාලෙත් මං චරිත තෝරා බේරා ගෙනයි රඟපෑවේ. දැන් තියෙන අවරගණයේ ටෙලි නාට්‍යවල චරිත නිරූපණයකට ඉඩක් නෑ. ඒ නිසා ලැබෙන ඇරැයුම් ප්‍රතික්ෂේප කරන්න සිදුවුණා.

සිනමා තිරයේදී ඔබට වඩාත් සංකීර්ණ චරිත නිරූපණයකට ඉඩකඩ ලැබුණා.

ඔව්. මං රඟපෑ චිත්‍රපට අතරින් වඩාත්ම සංකීර්ණ චරිත නිරූපණයකට ඉඩකඩ ලැබුණෙ ජයන්ත චන්ද්‍රසිරිගේ අග්නිදාහය චිත්‍රපටයෙන්. ඒ වසරේ හොඳම නිළි සම්මානයත් ඒකට පිරිනැමුණා.

සමනල සංධ්වනිය චිත්‍රපටයේ ඔබේ රංගනය දැනටමත් කතාබහට ලක්වෙලා

ඔව්. ඒක මගේ රංගන ජීවිතයේ අමරණීය අත්දැකීමක්. මෙතෙක් සිංහල සිනමාවටත් විෂය නොවුණු ලෝක සිනමාවෙත් විරල අපූර්වතම අත්දැකීමක්.


මොකක්ද ඒ අපූර්වත්වය යශෝධා?

හැම කෙනකුටම තව කෙනකුට කියා ගන්න බැරි ප්‍රකාශකර ගන්න බැරි හැඟීම් සමුදායක් තියෙනවා. හදවතේ කොනක ජීවිත කාලයක් පරිස්සමින් සඟවාතබාගත් ඒ අපූර්ව හැඟීම් සමුදායක් ගැනයි සමනල සංධ්වනියෙන් කියැවෙන්නේ.


ඔබේ ජීවිතෙත් කාටවත් කියාගන්න බැරි හැඟීම් සමුදායක් තියෙනවාද?

මට විතරක් නෙවේ ඒක හැමෝටම පොදුයි. හැම කෙනකුගේම ජීවිතෙන් කොටසක් මේ චිත්‍රපටයේ තියෙනවා.

කොහොමද ඒ අපූරු හැඟීම් සමුදාය එළියට දැම්මේ ඒක එළියට එන්නේ නැති ඇතුළාන්තයේම තැන්පත් වුණු අපූර්ව බැඳීමක්, සෙනෙහසක්, දයාවක්. පුණ්‍යා කියන තරුණියගේ ඇතුළාන්තය හඳුනාගන්නට සැලැස්වීමයි මගේ රංගන කාර්යය බවට පත්වුණේ.

ඒ කාර්යය සාර්ථක වුණාද?

අපොයි ඔව්. ජීවිතේ ප්‍රථම වතාවටයි මට රඟපෑමකින් පස්සේ ඒ චරිත නිරූපණය දිහා පිටස්තරයෙක් විදියට බලලා විඳින්න පුළුවන් වුණා. ඒක රංගන ශිල්පිනියකට කලාතුරකින් උදාවන භාග්යයක්.

චිත්‍රපටය නරඹද්දී ඔබට මොන විදියටද ඒක දැනෙන්නේ?

මේ රඟපෑවේ මමද කියලා හිතුණා. බොහෝ අවස්ථාවලදී අපේ රඟපෑම් දිහා ආපහු හැරිල බලන කොට හිතෙනවා අතන මීට වඩා හොඳට කරන්න තිබුණා නේද කියලා. ඒත් පුණ්‍යාගේ රංගනය දකිනකොට එහෙම හිතුණේ නෑ.

ඒ කියන්නේ ඔබට තවත් සාර්ථක රංගනයකට ඉඩක් නෑ කියන එකද?

ඇත්තටම එහෙම හැඟීමක් තමයි මට දැනුණේ. ඒ තරමටම මම තෘප්තිමත්. ඒත් අනාගතයේදී මේ වගේම සංකීර්ණ ක්‍රියාවලියකට ඉඩක් ලැබුණොත් ඒකට අවශ්‍ය පෝෂණය පුණ්‍යාගේ රංගනයෙන් මට ලැබුණා. අනාගත ප්‍රයෝජනය සඳහා ඒ අත්දැකීම පරිස්සම් කරලා තියාගන්නවා.

ඔබේ සාර්ථකත්වය පිටුපස ඉන්නේ අධ්‍යක්ෂවරයාද?

ඔව්. ඒ ගෞරවය ලැබෙන්නේ ජයන්ත චන්ද්‍රසිරිට. ජයන්ත කියන්නේ Actor trainer කෙනෙක්. ක්‍රිකට් ක්‍රිඩාවට coaucher කෙනෙක් ඉන්න ඕන වගේම භාවනාව ගැඹුරට ප්‍රගුණ කරන අයකුට උපදේශකයෙක් ඕනෑ වගේම රංගනයටත් අධ්‍යක්ෂ වරයාගෙ Guidence එකක් ලැබෙන්න ඕනෑ. ජයන්තගේ නිර්මාණයකදී ඒක Guidence එක සියයට සියයක්ම Actor කෙනකුට ලැබෙනවා.


රංගනය කියන්නේ රූපණවේදියාගේ පරිකල්පනීය නිර්මාණ වේශයක් නොවෙයිද?

actor කෙනකුට සහජ කුසලතාව විතරක් ප්‍රමාණවත් නෑ. ඔහුට හෝ ඇයට ඒ පරිකල්පනීය නිර්මාණ වේශය එළියට එන්න විද්යාත්මකව හැදෑරීමත් අවශ්‍යම වෙනවා.

ඔබ රංගන ශිල්පිනියක් හැටියට ඒ හැදෑරීම ප්‍රගුණ කරනවාද?

අපට එහෙම හදාරන්නට මේ රටේ රංග පාසලක් නෑ. ඒත් ජයන්තගේ නිර්මාණවලට දායක වෙන හැම අවස්ථාවකදීම සෑම රංගන ශිල්පියකුටම රූපණය පිළිබඳ අහ්‍යාස ලැබෙනවා. පිටපතේ තියෙන චරිත ඔහු එළියට අරගන්නේ දර්ශන තලයේදී. දර්ශන තලය ඇතුළේ ඔහු කරන අත්හදා බැලීම් හරිම අපූරුයි. චරිත අභ්යන්තරයෙන් එළියට ගන්න එක හරිම ප්‍රයෝගික වැඩපිළිවෙළක්.

- මව්බිම